ថ្ងៃ ព្រហស្បតិ៍ ទី ១៤ ខែ មករា ឆ្នាំ ២០១០
រាជធានីភ្នំពេញ ៖ សំនៀងដែលបន្លឺចេញពីបំពង់ក កញ្ញាខូ សុគន្ធធានី ហៅនីហ្សា ជួនកាលបទយេយេញ័រញាក់កន្ដ្រាក់អារម្មណ៍ ជួនកាលទៀតបទមនោសញ្ចេតនាលន្លង់លន្លោចបានបំរើអារម្មណ៍ប្រិយមិត្ដ ទស្សនិកជនជារៀងរាល់រាត្រីនៅភោជនីយដ្ឋាន “បុប្ផាជាយដែន” ក្នុងតំបន់បឹងត្របែកនៃរាជធានីភ្នំពេញ ។ ថ្វីដ្បិតតែនាងច្រៀងមិនសូវបានពីរោះក៏ពិតមែន តែនាងមានរូបសម្ពស្សស្រស់ស្អាតផូរផង់ប្រៀបបីដូចបុប្ផាក្រពុំមួយទង កំពុងចោលក្លិននិងគួរជាទីគយគន់ ធ្វើឱ្យបុរសកន្លង់ទាំងឡាយហើរឆ្វែលក្បែរប្រាណប្រាថ្នាចង់ ថ្នាក់ថ្នមប្រលោមសុំស្នេហាលើរូបនាងដែលគេស្គាល់ថា ជាតារាសំដែងកាយវិការខារ៉ាអូខេ និងជាតារាចំរៀងមួយរូបពោរពេញដោយទេពកោសល្យសំដែងនិងមានកាយវិការរស់ រវើក ។
កញ្ញា ខូ សុគន្ធធានី ហៅនីហ្សា បានឱ្យដឹងថា នាងបានឈានជើងចូលប្រឡូកក្នុងវិស័យសិល្បៈសំដែងតាំងពីឆ្នាំ២០០៥ តាមនិស្ស័យស្រឡាញ់ចូលចិត្ដរបស់នាងតាំងពីកុមារភាពមក ។ ការខិតខំប្រឹងប្រែងបញ្ចេញទេពកោសល្យសមត្ថភាពទាំងសំដែងនិង ច្រៀងរយៈពេល៥ឆ្នាំមកនេះ នាងមានការរីកចំរើនរលូនទៅមុខជានិច្ចក្នុងអាជីពជាតារាសំដែងនិង ច្រៀង ។ ប៉ុន្ដែនាងពុំទាន់មានកេរ្ដិ៍ ឈ្មោះនៅឡើយទេ ព្រោះនាងមិនទាន់មានឱកាសបានច្រៀងថតចូលក្នុងកាស្សែត ឬស៊ីឌី ប៉ុន្ដែកន្លងមកក្រៅពីច្រៀងជាប្រចាំក្នុងភោជនីយដ្ឋាននិងនៅតាម រោងការនានានោះ នាងក៏ធ្លាប់មានឱកាសបានឡើងច្រៀងជាកិត្ដិយសនៅលើឆាកប្រគំតន្ដ្រី ចុងសប្ដាហ៍ របស់ស្ថានីយទូរទស្សន៍ CTN ក្នុងកម្មវិធី “អេវ័ន” ផងដែរ ។ ក្រៅពីនោះ នាងតែងបានចូលរួមសំដែងថតកាយវិការខារ៉ាអូខេ តាមបទចំរៀងឱ្យផលិតកម្មទាំងក្នុង និងក្រៅប្រទេសជាច្រើនដូចជា ផលិតកម្មម៉ៃសាម៉េត ផលិតកម្មបុប្ពា ផលិតកម្មតោមាស រៃមាស និងផលិតកម្មមួយចំនួនទៀត។
កញ្ញា ខូ សុគន្ធធានី មានស្រុកកំណើតនៅស្រុកសំពៅមាស ខេត្ដពោធិ៍សាត់ ។ នាងមានបងប្អូន៧នាក់ ប្រុស៣នាក់ ស្រី៤នាក់ ហើយរូបនាងជាកូនទី៤ក្នុងគ្រួសារ ។ មកដល់ឆ្នាំនេះនាងមានអាយុ២៤ឆ្នាំហើយ ហើយនាងបានប្ដេជ្ញាចិត្ដយ៉ាងមោះមុតថា នៅថ្លៃ អនាគតនាងនឹងខិតខំកសាងកេរ្ដិ៍ឈ្មោះឱ្យបានល្បីក្នុងអាជីពរបស់ខ្លួន ដូចតារាល្បីផ្សេងៗទៀតដែរ ។
កញ្ញា ខូ សុគន្ធធានី សព្វថ្ងៃក្រៅពីច្រៀងជាប្រចាំនៅក្នុងភោជនីយដ្ឋាននិងសំដែងកាយវិការ ខារ៉ាអូខេតាមបទចំរៀង នាងក៏មានអាជីពមួយទៀតគឺជាអាជីវករលក់សំលៀកបំពាក់នៅក្ន្នុងផ្សារ ចាស់ផងដែរ ។ ទាក់ទិននឹងជីវិតផ្ទាល់ខ្លួននាងបានអះអាងថា សព្វថ្ងៃនេះនាងមិនទាន់មានសង្សារឬជាប់ពាក់ព័ន្ធពាក្យសំដីស្នេហា ជាមួយបុរសណាម្នាក់នោះទេ ព្រោះនាងយកចិត្ដទុកដាក់តែនៅលើវិស័យសិល្បៈចំរៀង និងសំដែង និងមុខរបរលក់សំលៀកបំពាក់នៅផ្សារតែប៉ុណ្ណោះ ឯរឿងស្នេហាមិនទាន់បានគិតទេ ។ តែពុំមែន មានន័យថា នាងគ្មានគេស្រឡាញ់នោះដែរ គឺមានបុរសមិនថាវ័យចំណាស់ ឬ ក្មេងស្ទាវកម្លោះៗនោះទេបានតាមប្រលោម សុំសេចក្ដីស្នេហាពីនាងយ៉ាងច្រើន តែនាងតែងឆ្លើយបដិសេធរហូត។
កញ្ញា ខូ សុគន្ធធានី ហៅនីហ្សា កន្លងមក ដើម្បីទាក់ទាញប្រិយមិត្ដអ្នកស្ដាប់សម្លេងរបស់នាងឱ្យបានច្រើននោះ នាងតែងតែបាន ជ្រើសរើសបទចំរៀងចំរុះមកច្រៀងដោយមិនប្រកាន់ថាបទមនោសញ្ចេតនាចាស់ៗ ពីសម័យមុនបទចំរៀងចង្វាក់រាំវង់ រាំក្បាច់ សារ៉ាវ៉ាន់ ឡាំលាវ និងបទញ័រញាក់កន្ដ្រាក់អារម្មណ៍ឡើយ មិនតែប៉ុណ្ណោះនាងបានស្លៀកពាក់តម្រូវទៅតាមបទចំរៀងនោះ ប៉ុន្ដែ ជាញឹកញាប់នាងតែងតែស្លៀកពាក់សិចស៊ី បញ្ចេញគល់ភ្លៅ ក្បាលពោះ និងដើមទ្រូង ឃើញសាច់សខ្ចីទៀតផង ៕
កញ្ញា ខូ សុគន្ធធានី ហៅនីហ្សា បុប្ផាដងស្ទឹងពោធិ៍សាត់
Source:http://www.kohsantepheapdaily.com.kh/
No comments:
Post a Comment