ថ្ងៃ សៅរ៍ ទី ៩ ខែ មករា ឆ្នាំ ២០១០
រាជធានីភ្នំពេញ ៖ កញ្ញាគឹម លីហ្សា ជាតារាចំរៀង និងជាតារាសំដែងកាយវិការខារ៉ាអូខេ និងជាតារាភាពយន្ដ-វីដេអូ ដែលពេលនេះកំពុងតែរះយ៉ាងត្រចះត្រចង់ក្នុងពិភពសិល្បៈ ។
គឹម លីហ្សា ជាចំប៉ីសៀមរាបដែលត្រូ ឪពុក ម្ដាយនាំមកបណ្ដុះបណ្ដាលនៅរាជធានីភ្នំពេញតាំងពីកុមារភាពមក ដែលពេលនេះនាងមានវ័យ២២ឆ្នាំហើយ។ នាងរៀបរាប់ថា ដោយសារតែមាននិស្ស័យស្រលាញ់ចូលចិត្ដសិល្បៈតាំងពីកុមារភាពមក នាងបានចិញ្ចឹមចិត្ដប្រាថ្នាចង់ក្លាយជាតារាចំរៀង និងសំដែង ហើយនៅចុងឆ្នាំ២០០៤ នាងបាន សំរេចចិត្ដបណ្ដែតខ្លួនចូលប្រឡូកនៅក្នុងវិស័យសិល្បៈចំរៀង ខណៈនាងជាប់សិក្សាផងដែរ ។ ដោយសារតែមានទឹកដមសំលេងពីរោះ និងរូបសម្ពស្សស្រស់សោភា និងមានកាយវិការរស់រវើកផងនោះ រយៈពេលប៉ុន្មាន ឆ្នាំមកនេះនាងមានការរីកចំរើនទៅមុខយ៉ាងលឿន ។ ក្រោយពីនាងមានកេរ្ដិ៍ឈ្មោះល្បីគួរសមហើយនោះ នាងបានឈប់ ច្រៀងនៅតាមភោជនីយដ្ឋានដូចមុនទៀតហើយ។
កញ្ញា គឹម លីហ្សា ឱ្យដឹងថា កន្លងមក នាងធ្លាប់ធ្វើជាអ្នកចំរៀងប្រចាំនៅភោជនីយដ្ឋានទីក្រុងមាស ប៉ុន្ដែក្រោយមកដោយសារនាងជាប់រវល់ក្នុងអាជីពផ្សេង និងការសិក្សា នាងឈប់ច្រៀងនៅតាមភោជនីយដ្ឋានទៀត ដោយងាកទៅច្រៀងជាកិត្ដិយសនៅលើឆាកប្រគំតន្ដ្រីចុងសបា្ដហ៍តាម ស្ថានីយទូរទស្សន៍នានាវិញ។ លើសពីនេះនាងបានថត សំលេងចូលស៊ីឌី និងសំដែងកាយវិការខារ៉ាអូខេឱ្យផលិតកម្មរៃមាស ។ ក្រៅពីនេះនាងបានក្លាយជាតារាសំដែងភាពយន្ដ-វីដេអូផងដែរ ដូចជាសំដែងក្នុងរឿង“ទ្រុងមាសបក្សី ស្នេហ៍” ចាក់ផ្សាយតាមកញ្ចក់ទូរទស្សន៍បាយ័ន រឿង “អាបកាលីប០០៩” ដាក់បញ្ចាំងនៅរោងភាពយន្ដសូរិយាកន្លងមក និងរឿង “សុគន្ធថេរាយុលងបះសក់” ត្រៀម ដាក់បញ្ចាំងនៅរោងភាពយន្ដសូរិយានាថ្ងៃទី៩ មករា ២០១០ និងរឿងចុងក្រោយដែលនាងកំពុងថតនោះ គឺរឿង“ល្មមហើយលោកប្ដី” ជាវីដេអូភាគសំរាប់ចាក់ផ្សាយតាមកញ្ចក់ទូរទស្សន៍ប៉ុស្ដិ៍លេខ៥ ។ នៅក្នុងខ្សែភាពយន្ដទាំងអស់ដែលនាងធ្លាប់បានចូលរួមសំដែងកន្លងមក ភាគច្រើននាងសំដែងជាតួកាចឆ្នាសឆ្នើម ។
កញ្ញា គឹម លីហ្សា ក្រៅពីមានកេរ្ដិ៍ឈ្មោះបោះសំលេងនៅក្នុងប្រទេសនាងក៏មានការ ចាប់អារម្មណ៍ពីសំណាក់បងប្អូនខ្មែរ ដែលរស់នៅក្រៅប្រទេសផងដែរ។ ដូច្នេះហើយទើបកន្លងមកនាងធ្លាប់បានចេញទៅច្រៀងនៅប្រទេសអូស្ដ្រា លី កាលពីចុងឆ្នាំ ២០០៧ និងបានទៅប្រទេសបារាំងកាលពីពាក់កណ្ដាលឆ្នាំ២០០៩ ។ ការចេញទៅសំដែងនៅក្រៅប្រទេសកន្លងមកនាងអះអាងថា មានការគាំទ្រពីបងប្អូនខ្មែរយើងរស់នៅទីនោះយ៉ាងច្រើន។ នៅក្នុងឆ្នាំ២០១០ នេះនាងមានគំរោងចេញទៅសំដែងនៅប្រទេសអូស្ដ្រាលីម្ដងទៀត និងចេញទៅច្រៀងនៅសហរដ្ឋអាមេរិក ប៉ុន្ដែមិនទាន់កំណត់ពេលច្បាស់ទេ ព្រោះជាប់រវល់សំដែងរឿងភាគឱ្យស្ថានីយទូរទស្សន៍ប៉ុស្ដិ៍លេខ៥ ។
កញ្ញា គឹម លីហ្សា ក្រៅពីទទួលជោគជ័យក្នុងអាជីពសិល្បៈនាងក៏មានអាជីពជាម្ចាស់ហាងលក់ សំលៀកបំពាក់យីហោ “លីហ្សាឡាម៉ូដ” នៅក្បែររោងភាពយន្ដលុច្សផងដែរ។ ទោះជាយ៉ាងណាក្ដីសព្វថ្ងៃនាងកំពុងតែប្រកាសសេងហាងរបស់នាង ដោយសារនាងគ្មានពេលទំនេរ ព្រោះជាប់រវល់ថតច្រើន និងរវល់ចេញទៅសំដែងនៅឯ
បរទេស ។
កញ្ញា គឹម លីហ្សា មានស្រុកកំណើតនៅខេត្ដសៀមរាប មានបងប្អូនស្រី២នាក់ ក្នុងនោះរូបនាងជាកូនពៅ។ សព្វថ្ងៃបងស្រី របស់នាងរស់នៅប្រទេសបារាំង ។ ទាក់ទងនឹងជីវិតស្នេហា នាងឱ្យដឹងថា នាងគ្មានជាប់ពាក់ព័ន្ធស្នេហាជាមួយបុរសណាម្នាក់ទេ ប៉ុន្ដែឪពុក ម្ដាយរបស់នាងគ្រោងរៀបចំទុកដាក់ឱ្យនាងមានគូនាពេលឆាប់ៗខាងមុខ ដែល បុរសនោះរស់នៅសហរដ្ឋអាមេរិក ប៉ុន្ដែនាងមិនទាន់មានគំរោងរៀបការទេ ព្រោះនាងមិនទាន់ឃើញកូនកំលោះ៕
កញ្ញាគឹម លីហ្សា ជាតារាចំរៀង និងជាតារាសំដែងកាយវិការ(ដោយ៖ រស្មី)
Source:http://www.kohsantepheapdaily.com.kh/
No comments:
Post a Comment