ថ្ងៃ សៅរ៍ ទី ២ ខែ មករា ឆ្នាំ ២០១០
រាជធានីភ្នំពេញ ៖ ប្រិយមិត្ដអ្នកអានពិតជាធ្លាប់ស្គាល់កញ្ញាញឹម ចាន់ថន តាមរយៈទូរទស្សន៍នានាគ្រប់កម្មវិធីប្រគំតន្ដ្រីចុងសបា្ដហ៍ញឹកញាប់មក ហើយ ជាពិសេសនាងអតីតជាពិធីការិនីក្នុងកម្មវិធី “អេវ័ន”របស់ ស្ថានីយទូរទស្សន៍ CTN។កញ្ញា ញឹម ចាន់ថន ក្នុងវ័យ២៩ឆ្នាំដ៏ ស្រស់សោភានេះ កន្លងមកបានចាប់អាជីពជាអ្នកចំរៀងតាមភោជនីយដ្ឋានក្នុងទីក្រុងភ្នំពេញ និងជាតារាចំរៀងកិត្ដិយសក្នុងកម្ម វិធីប្រគំតន្ដ្រីចុងសបា្ដហ៍តាមស្ថានីយទូរទស្សន៍នានា។
ទីបំផុតនាងបានក្លាយជាអ្នកចំរៀងថតសំលេងចូលស៊ី ឌី និងជាតារា សំដែងភាពយន្ដ និងជាតារាសំដែងកាយវិការខារ៉ាអូខេ ។ ឆ្លងកាត់ក្នុងវិស័យសិល្បៈ ចំរុះរយៈពេល១០ឆ្នាំមកនេះ កញាញឹម ចាន់ ថន ទទួលជោគជ័យក្នុងអាជីពយ៉ាងត្រចះត្រចង់រហូតមានឈ្មោះល្បីទាំងក្នុង និងក្រៅប្រទេស ។កញ្ញាញឹម ចាន់ថន កន្លងមកធ្លាប់ចូល រួមសំដែងភាពយន្ដជាច្រើនរឿងដូចជារឿង “មេអំបៅមាស” និងរឿង“ស្នាមស្នេហ៍ សមុទ្ររាម” ជាដើម។
ក្រៅពីនេះនៅចុងឆ្នាំ២០០៩ នេះនាងបានចូលរួមសំដែងរឿងអប់រំ និងខ្សែវីដេអូភាគសំរាប់ចាក់ផ្សាយតាមកញ្ចក់ទូរទស្សន៍ប៉ុស្ដិ៍លេខ ៥ គឺរឿង “ល្មមហើយលោកប្ដី” ដោយនាងត្រូវអ្នកដឹកនាំរឿងតំរូវឱ្យសំដែងជាតួប្រពន្ធរបស់លោក ទេព រិនដារ៉ូ ។កញ្ញាញឹម ចាន់ថន ឱ្យដឹងថា សព្វថ្ងៃនេះក្រៅពីមានអាជីពជាអ្នកសិល្បៈ នាងមានអាជីពមួយទៀត គឺបើកហាងលក់សំលៀកបំពាក់ទាន់សម័យមួយស្ថិតនៅក្បែររោងភាពយន្ដលុច្ស ជ្រុងខាងកើតប្រមាណ២០ម៉ែត្រ។
នាងនិយាយថា ថ្វីដ្បិតតែការងាររកស៊ី និងអាជីពសិល្បៈទទួលជោគជ័យ តែរឿងស្នេហាបែរជាបរាជ័យទៅវិញ។ នាងស្រលាញ់គ្នាជាមួយបុរសវ័យស្រករនាងធ្វើការងារនៅក្នុងក្រុមហ៊ុន ឯកជនមួយ តែកាលពីពាក់កណ្ដាលឆ្នាំ២០០៩ នេះបានបែកបាក់ចែកផ្លូវគ្នាវិញដោយមិនចុះសំរុងនឹងគ្នា ។ ក្រោយពីបែកបាក់ពីបុរសនោះមកនាងពុំមានទំនាក់ទំនងស្នេហាជាមួយបុរស ណាម្នាក់ ទៀតទេ ហើយក៏មិនចង់មានស្នេហាទៀតដែរ។
នាងនិយាយថា “នាងខ្ញុំរាងចាល ហើយប្រុសៗ” ។កញ្ញាញឹម ចាន់ថន មានស្រុកកំណើតនៅ ខេត្ដកំពត ឪពុកឈ្មោះញឹម សាមឿន ម្ដាយ ឈ្មោះភី សារី។ នាងមានបង ប្អូន៥នាក់ ក្នុងនោះស្រី៣នាក់ ចំណែករូបនាងជាកូនទី៣ ។ នាងបានឈានជើងចូលប្រឡូកក្នុងវិស័យសិល្បៈចំរៀងតាំងពីឆ្នាំ១៩៩៧ មកដោយច្រៀងនៅតាមពិធីមង្គលការជាមួយក្រុមតន្ដ្រីសម័យខេត្ដកំពត ។ ក្រោយមកនៅឆ្នាំ១៩៩៨ នាងបានបណ្ដែតជីវិតចូលប្រឡូកពិភពសិល្បៈនៅរាជធានីភ្នំពេញរហូត មានឈ្មោះល្បីដល់សព្វថ្ងៃនេះ ។
កញ្ញា ញឹម ចាន់ថន (រូបថត Saray)
No comments:
Post a Comment