ដោយ ៖ សាម៉ន
ថ្ងៃ ពុធ ទី ១៣ ខែ មករា ឆ្នាំ ២០១០
រាជធានីភ្នំពេញ ៖ សាសា តារាចំរៀង ដែលមានរូបស្រស់សោភាជាប់ជាអ្នកចំរៀង កូនកាត់បានបង្ហើបឱ្យដឹងថា នាងត្រៀមខ្លួន ចេញទៅច្រៀងឱ្យផលិត កម្មថ្មីមួយទៀតក្នុងពេលឆាប់ៗនេះ ខណៈពេលនាងព្រមសារភាពថា ទំនាក់ទំនងស្នេហារបស់នាងជាមួយកូនមន្ដ្រីម្នាក់ធ្លាប់តែល្អូកល្អឺន នោះត្រូវបានបែកបាក់ហើយ ។
សាសា ធ្លាប់រងនូវការរិះគន់អំពីរូបថតបែបសិចស៊ីលេចលើលេចក្រោមនិងជួប រឿងស៊យដោយភ័ន្ដច្រឡំ ។ បទថ្មីៗពេញនិយម២បទរបស់នាង គឺបទ ស្នេហ៍កុំបង្ខំ និងបទក្រមុំចាស់ចាយរៀង ដែលនាងច្រៀងក្នុងផលិតកម្មក្លាស្ស៊ិក វ៉ុលចុងក្រោយ។ ទាំង២បទនេះកំពុងទទួលបានការគាំទ្រយ៉ាងខ្លាំង ដែលគេមិននឹកស្មានថា នាងត្រូវលាចាកទ្រនំចាស់ផ្លាស់យកទ្រនំថ្មីបែបនេះឡើយ ។ ពាក់ព័ន្ធដល់ការត្រៀមខ្លួនចេញទៅច្រៀងឱ្យផលិតកម្មថ្មីនោះ កញ្ញា សាសា បានប្រាប់ថា នាងមិនមានបញ្ហាអ្វីជាមួយផលិតកម្មក្លាស្ស៊ិកនោះទេ តែការចាកចេញរបស់នាងពេលនេះក៏ព្រោះតែផលិតកម្មក្លាស្ស៊ិកយឺត យ៉ាវក្នុងការចេញវ៉ុលថ្មីៗដែលធ្វើឱ្យនាងមានការព្រួយបារម្ភអំពី ការបាត់បង់ប្រជាប្រិយភាព ។ យ៉ាងណាក៏ដោយចុះសាសា នាងបាន និយាយថានាងមិនបោះបង់ចោលផលិតកម្ម ក្លាស្ស៊ិកនោះទេ នៅពេលដែលផលិតកម្មនេះត្រូវការរូបនាង នាងពេញចិត្ដនឹងច្រៀងជូនបាន ។
សាសា ឆ្នាំនេះមានអាយុ២០ឆ្នាំ ក្នុងអាជីពជាអ្នកចំរៀងសម័យ សាសាកំពុងតែឈរនៅក្នុងជួរអ្នកចំរៀងល្បីៗនិងកំពុងពេញនិយមសំរាប់ ស្រទាប់យុវវ័យ ។ ការពិតណាស់តារាចំរៀងដែលល្បីមិនខុសអ្វីពីដើមឈើដែលដុះខ្ពស់ហើយ រងនូវខ្យល់បោកបក់នោះឡើយ ។ មួយរយៈចុងក្រោយនេះតារាចំរៀងវ័យ ក្មេងងរូបស្រស់សាសាបានរងនូវការរិះគន់យ៉ាងខ្លាំងនៅពេលដែល ព័ត៌មាន លេចឮមកខាងក្រៅមិនដូចគ្នាទៅនឹងអ្វី ដែលរូបនាងបានសាង ។ ម្យ៉ាង ទៀត ស្របពេលដែលរលកនៃការរិះគន់មិនសមហេតុផលកាន់តែពុះកញ្ជ្រោលទៅលើ រូបថតបែបសិចស៊ីរបស់សាសា បានធ្វើឱ្យកេរ្ដិ៍ឈ្មោះរបស់នាងកាន់ តែត្រូវបានញាំញី។ ប៉ុន្ដែសាសាបានបង្ហាញនូវភាពមិនចុះចាញ់ចំពោះទម្ងន់នៃការរិះគន់មក លើរូបនាង ហើយខិតខំបន្ដការកសាងនូវទង្វើល្អរួមទាំងផ្ដាំ ផ្ញើសម្លេងពិតតាមរយៈសារព័តត៌មាន ទីបំផុតព័ត៌មានអាស្រូវការរិះគន់ទាំងឡាយក៏បានសាបរលាបក្នុងរយៈពេលដ៏ ខ្លី ហើយស្រស់ស្រីសាសានៅតែរក្សាបានកេរ្ដិ៍ឈ្មោះនិងប្រជាប្រិយភាពដដែលលើ វិថីសិល្បៈ។
ចំពោះបញ្ហាស្នេហាវិញសាសាបានបញ្ជាក់ថា រូបនាងបានផ្ដាច់ចំណងទាក់ទងជាមួយកូនមន្ដ្រីជាន់ខ្ពស់ម្នាក់នោះហើយ បើទោះបីជាពេលខ្លះគេបាន ឃើញកម្លោះរូបនោះព្យាយាមស្កាត់ជួបនាងក៏ដោយ ។ នាងប្រាប់ថា ការផ្ដាច់ចំណងទាក់ទងនោះ គឺមិនមានមូលហេតុអ្វីធំដុំនោះទេ តែសំរាប់អ្នក សិល្បៈ ដូចរូបនាងគឺយកល្អកុំទាន់ចង់ពាក់ព័ន្ធនឹងបញ្ហាស្នេហាធ្វើអ្វី ព្រោះអាចប្រឈមមុខនឹងការរិះគន់ផ្លូវអាក្រក់ ។ ម្យ៉ាងទៀតប្រសិនបើ នាងប្រថុយលង់ខ្លួននឹងបញ្ហាស្នេហានៅពេលនេះ នាងជឿថាអាជីពរបស់នាងនឹងបរាជ័យមិនខាន ព្រោះថាបើមានស្នេហាប្រាកដជាមានការប្រចណ្ឌមិនខាន ហើយផ្ដើមពីការប្រចណ្ឌនោះលទ្ធផលអវិជ្ជមាននឹងកើតឡើងជាបន្ដបន្ទាប់ ។
ក្រៅពីច្រៀងឱ្យផលិតកម្មក្លាស្ស៊ិក សាសាក៏មានការមមាញឹកខ្លាំងផងដែរ ក្នុងការសំដែង Concert តាមបណ្ដាខេត្ដដើម្បីផ្សព្វផ្សាយផលិតផលឱ្យក្រុម ហ៊ុនមួយចំនួន។ អំឡុងខែកុម្ភៈនេះនាងនឹងចេញទៅ ច្រៀងឱ្យ ផលិតកម្មថ្មីឈ្មោះ Town Entertainment ដែលនាងមានជំនឿជាមុនថាផលិតកម្មថ្មីនេះនឹងចូលរួមប្រកួតប្រជែង ដណ្ដើមទីផ្សារជាមួយផលិតកម្មដទៃទៀតមិនខាន ព្រោះផលិតកម្មនេះមានការត្រៀមរៀបចំដោយមានទំនុកចិត្ដបំផុត ៕
សាលា តារាចំរៀងដែលមានរូបស្រស់ដូចកូនកាត់
Source:http://www.kohsantepheapdaily.com.kh/
No comments:
Post a Comment