ថ្ងៃ អង្គារ ទី ២៦ ខែ មករា ឆ្នាំ ២០១០
រាជធានីភ្នំពេញ ៖ ទោះបីបច្ចុប្បន្នការសម្ដែងកាយវិការខារ៉ាអូខេ និងភាពយន្ដបានធ្លាក់ចុះទន្ទឹមនឹងសេដ្ឋកិច្ចពិភពលោកធ្លាក់ចុះដែរ ក៏ដោយ ក៏សព្វថ្ងៃក្រុមយុវជន យុវនារីជាច្រើននៅតែព្យាយាមធ្វើខ្លួនឱ្យក្លាយជាតារាសម្ដែង ឬជាតារាចំរៀងព្រោងព្រាត ហើយកំពុងបញ្ចេញសមត្ថភាពទេពកោសល្យសម្ដែងរៀងៗខ្លួន ដើម្បីដណ្ដើមយកប្រជាប្រិយភាពពីប្រិយមិត្ដទស្សនិកជន និងធ្វើឱ្យខ្លួនមានកេរ្ដិ៍ឈ្មោះល្បីក្នុងពិភពសិល្បៈ ។
ជាមួយគ្នានេះដែរកញ្ញា ផាន់ ស្រីរ័ត្ន ក្នុង វ័យ១៩ឆ្នាំ ក៏បានចាប់អាជីពជាអ្នកសម្ដែងកាយវិការខារ៉ាអូខេតាមបទចំរៀង និងជាអ្នកសម្ដែងភាពយន្ដវីដេអូថ្មីមួយរូប ដែល ទើបនឹងចាប់ផ្ដើមលេចមុខនៅក្នុងពិភពសិល្បៈសម្ដែង ។ កញ្ញា ផាន់ ស្រីរ័ត្ន បានឱ្យដឹងថា នាងបានចាប់អាជីពសម្ដែងនេះនៅឆ្នាំ ២០០៧ បន្ទាប់ពីបងស្រីនាងឈ្មោះផាន់ ស្រី រ័ត្ន តារាសម្ដែងទទួលបានជោគជ័យ ហើយទៅរស់នៅប្រទេសបារាំងកាលពីប៉ុន្មានឆ្នាំមុននេះ ។ ស្រីតូចច្រឡឹងសាច់សម៉ដ្ឋខៃសំដីផ្អែមរូបនេះ ទោះបីមិនបានហ្វឹកហាត់រៀនសម្ដែងនៅក្លឹបណាមួយក៏ដោយ ក៏នាងមានទេពកោសល្យសម្ដែងបានល្អអាចចាប់អាជីពជាតារាសម្ដែងរហូត ទទួលបានការគាំទ្រពីប្រិយមិត្ដទស្សនិកជនជាច្រើន ហេតុនេះហើយទើបកន្លងមកមានផលិតកម្មទាំងក្នុង និងក្រៅប្រទេសជាច្រើនបានហៅនាងឱ្យទៅចូលរួមសម្ដែងថតកាយវិការ ខារ៉ាអូខេ ដូចជាផលិតកម្មរៃមាសជាដើម ។ ក្រៅពីនេះកន្លងមកនាងធ្លាប់បានចូលរួមសម្ដែងថតភាពយន្ដបានចំនួន៤ រឿងហើយដែរគឺរឿង “៥០០ឆ្នាំចាំស្នេហ៍” រឿង“វិញាណចាំជាតិ” (តួឆ្នាស់) រឿង“ព្រាយពស់” និងរឿង“សាកសពកំបុតក្បាល” ជាដើម។ កញ្ញា ផាន់ ស្រីរ័ត្ន បានប្រាប់ថា ទោះបីសព្វថ្ងៃនាងពុំទាន់ក្លាយជាតារាសម្ដែងដែលមានកេរ្ដិ៍ឈ្មោះល្បី យ៉ាងណាក៏ដោយ ក៏នាងមានចិត្ដសប្បាយរីករាយដែរ ពីព្រោះនាងបានក្លាយជាតារាសម្ដែងមួយដួងដែលមានប្រិយមិត្ដ ទស្សនិកជន និងអ្នកដឹក នាំរឿងរួមទាំងម្ចាស់ផលិតកម្មនានាមានការចាប់អារម្មណ៍លើរូបនាង ហើយផ្ដល់ឱកាសឱ្យនាងបានសម្ដែងកាយវិការបញ្ចេញទេពកោសល្យសមត្ថភាពឱ្យ មហាជនទូទៅ បានឃើញដូច្នេះហើយពីមួយថ្ងៃទៅមួយថ្ងៃនាងមានការងារសិល្បៈសម្ដែងជា បន្ដបន្ទាប់។ ហេតុនេះហើយដើម្បីពង្រីកអាជីពសិល្បៈបន្ថែមទៀត និងមានកេរ្ដិ៍ ឈ្មោះល្បីក្នុងពិភពសិល្បៈនោះ ពេលទំនេរនាងបានខិតខំប្រឹងប្រែងហ្វឹកហាត់រៀនច្រៀងនៅក្លឹបសិល្បៈ មួយក្នុងរាជធានីភ្នំពេញ ក្នុងបំណងចាប់អាជីពជាអ្នកចំរៀងនៅតាមភោជនីយដ្ឋាន ច្រៀងថតសម្លេងចូលស៊ីឌី និងច្រៀងជាកិត្ដិយសនៅលើឆាកប្រគំតន្ដ្រីចុងសបា្ដហ៍តាម ស្ថានីយទូរទស្សន៍នានាជូនប្រិយមិត្ដទស្សនិកជនឱ្យគេបានស្គាល់កាន់តែ ច្រើននោះនាងនឹងមានកេរ្ដិ៍ឈ្មោះល្បីជាក់ជាមិនខានឡើយ ។ កញ្ញា ផាន់ ស្រីរ័ត្ន មកដល់ឆ្នាំនេះនាងមានអាយុ១៩ឆ្នាំហើយ និងមានស្រុកកំណើតនៅស្រុកក្រូចឆ្មារ ខេត្ដកំពង់ចាម ។ នាងមានបងប្អូន៦នាក់ ប្រុស៤ ស្រី២ នាងជាកូនទី៣ នៅក្នុងគ្រួសារ ហើយត្រូវឪពុកម្ដាយនាំមករស់នៅរាជធានីភ្នំពេញ កាលពីឆ្នាំ២០០២ ដែលសព្វថ្ងៃរស់នៅក្នុងខណ្ឌឫស្សីកែវ រាជធានីភ្នំពេញ ហើយនាងបានបញ្ចប់ការសិក្សាត្រឹមថ្នាក់ទី៩ប៉ុណ្ណោះ ។ ដោយសារស្រឡាញ់សិល្បៈខ្លាំងពេក ទើបនាងឈប់សិក្សាយកពេលវេលាមកសម្ដែងថតកាយវិការខារ៉ាអូខេតាមបទចំរៀង និងសម្ដែងថតភាពយន្ដវីដេអូ ដោយនាងមានក្ដីសង្ឃឹមក្នុងចិត្ដយ៉ាងមុត្មាំថា នាងនឹងមានអនាគតល្អក្នុងវិស័យសិល្បៈសម្ដែង និងច្រៀងមិនខានឡើយ ។
ទាក់ទងនឹងជីវិតស្នេហា កញ្ញា ផាន់ ស្រី រ័ត្ន និយាយថា សង្សារមិនយកទេ បើយកគឺយកប្ដីតែម្ដង តែមិនមែនពេលនេះទេ ចាំប្រឡូកក្នុងវិស័យសិល្បៈបានយូរបន្ដិចទើបបើកបេះដូង ។ ពេលនេះមិនមែនបានន័យថា គ្មានអ្នកស្រឡាញ់នោះដែរ គឺមានប្រុសៗកំលោះជាច្រើនកំពុងជ្រួលជ្រើមតាមសុំសេចក្ដីស្នេហាពី នាងតែនាងបានបដិសេធមិនទទួលពាក្យលួងលោមរបស់ប្រុសៗកំលោះទាំងនោះទេ ដោយនាងយល់ថា នាងនៅក្មេងមិនទាន់ចង់មានស្នេហានៅក្នុងវ័យនេះទេ ៕
កញ្ញា ផាន់ ស្រីរ័ត្ន ក្នុង វ័យ១៩ឆ្នាំ្ ជាតារាសំដែង
Source:http://www.kohsantepheapdaily.com.kh/
No comments:
Post a Comment