ថ្ងៃ ពុធ ទី ២៥ ខែ សីហា ឆ្នាំ ២០១០
រាជធានីភ្នំពេញ ៖ តារាសំដែងរូបស្រស់សំរស់មិនចេះរុះរោយ លី ម៉ារីណា បានសំរេចចិត្តរួចហើយថានឹងចេញទៅរស់នៅសហរដ្ឋអាមេរិកជាមួយ ស្វាមី ក្រោយពីការរៀបអា ពាហ៍ពិពាហ៍ ដែលមិនទាន់កំណត់ពេលវេលាច្បាស់លាស់នៅឡើយ ។ នាងលី ម៉ារីណា និងគូដណ្តឹងរបស់នាងគឺលោកសាត ចាន់ថន អាណិកជនខ្មែររស់នៅ សហរដ្ឋអាមេរិកបានរៀបចំពិធីភ្ជាប់ពាក្យកាលពីថ្ងៃទី៦ សីហា ឆ្នាំ២០១០ នៅភោជនីយដ្ឋានឡាក់គីស្តារ ។ តារាសំដែងរូបនះធ្លាប់រៀបអា ពាហ៍ពិពាហ៍ម្តងរួចមកហើយជាមួយអ្នករៀបចំកម្មវិធីដ៏ល្បីឈ្មោះប្រចាំ ស្ថានីយទូរទស្សន៍បាយ័ន ប៉ុន្តែការរួមរស់នៅជាមួយគ្នា រវាងស្វាមីភរិយាទាំងពីរនាក់គឺមានរយៈ ពេលតែ៣៦ថ្ងៃប៉ុណ្ណោះ ហើយការចែកផ្លូវគ្នាយ៉ាងឆាប់រហ័សដូច្នេះត្រូវបានភាគីទាំងសងខាង អះអាងថា ជាការមិនចុះសំរុងនឹងគ្នា ។
ពាក់ព័ន្ធជាមួយចំណងអាពាហ៍ពិពាហ៍ថ្មីនេះ នាងលី ម៉ារីណា បានប្រាប់អ្នកសារព័ត៌មានថា នាងមានទំនាក់ទំនងជាមួយគ្នាអស់រយៈពេលជាងមួយឆ្នាំមកហើយ ហើយជាទំនាក់ទំនងស្នេហាបែបសាមញ្ញព្រោះនាងមិនចូលចិត្តការ បង្កើតនូវចំណងស្នេហាគគ្រឹកគគ្រេងហឺុហា និងបញ្ចេញនូវអ្វីដែលនាំឱ្យគេមើលឃើញថា ហួសពី
ប្រជាពលរដ្ឋទូទៅ នោះឡើយ ។ នាងបន្តថា ថ្ងៃភ្ជាប់ពាក្យរបស់នាងមិនបានអញ្ជើញភ្ញៀវច្រើនចូលរួមទេ គឺរៀបចំតាមប្រពៃណីធម្មតានិងស័ក្តិសមល្មមតាមកេរិ៍្តឈ្មោះរបស់ នាង ។ អនាគតស្វាមីរបស់នាងគឺជាបុគ្គលិកក្នុងកាស៊ីណូមួយនៅ សហរដ្ឋអាមេរិក ហើយក៏ជាអ្នកដែលមានចរិតសាមញ្ញដូចនាងដែរ ។
នាងលី ម៉ារីណា មិនបាននិយាយប្រាប់ថា អាពាហ៍ពិពាហ៍របស់នាងនឹងត្រូវរៀបចំនៅពេលណានោះទេ តែនាងប្រាប់ថា ក្រោយពីពិធីភ្ជាប់ពាក្យរួចគូដណ្តឹងរបស់នាងបានរៀបចំឯកសារ និងរត់ការ ដើម្បីយកនាងទៅរស់នៅសហរដ្ឋអាមេរិកជាមួយគ្នា ។ ការប្រាប់ព័ត៌មានបែបនេះបានធ្វើឱ្យសាធារណមតិមានការសង្ស័យថា
នាង លី ម៉ារីណា ប្រែហលជាត្រូវចេញទៅរៀបការនៅសហរដ្ឋអាមេរិកច្រើនជាងរៀបការនៅស្រុកខែ្មរ ។
នាងលី ម៉ារីណា ជាតារាសំដែងដែលមាន ទេពកោសល្យ និងបង្ហាញនូវភាពស្រគត់ស្រគំច្រើនជាងតារាសំដែងដទៃទៀត ។ ភាពរស់នៅជាស្ត្រីមេម៉ាយជាង៥ឆ្នាំ នាងលី ម៉ារីណា មិនដែលលេចឮនូវរឿងអាស្រូវនៃទំនាក់ទំនងស្នេហាម្តងណាឡើយ បើទោះបីជាកន្លង់ជាច្រើនមានបំណង និងហិចហើរបញ្ឆិតបញ្ឆៀងចង់ក្រេបលំអងបុបា្ផមួយទងនេះក៏ដោយចុះ ។ ចំណែកក្នុងវិថីសិល្បៈវិញ តារាមួយដួងនេះថ្វីដ្បិតតែមានវ័យចំណាស់បន្តិចមែន តែប្រជាប្រិយភាពរបស់នាងហាក់ដូចមិនចុះថយ ឬបាត់បង់ការគាំទ្រនោះទេ ចាប់តាំងពីពេលដែលនាងបានចូលរួម ប្រឡូកក្នុងវិស័យសិល្បៈមក ៕
រូបថតកោះសន្តិភាពនាងលី ម៉ារីណា និងគូដណ្តឹង
Source:http://kohsantepheapdaily.com.kh/article/20100824-011337.html
No comments:
Post a Comment