ថ្ងៃ សុក្រ ទី ៤ ខែ មិថុនា ឆ្នាំ ២០១០
រាជធានីភ្នំពេញ ៖ កញ្ញាកែវ សូរិយា តារាសំដែងកាយវិការខារ៉ាអូខេ និងភាពយន្ដព្យាយាមប្រកួតប្រជែងទាក់ទាញយកប្រជាប្រិយភាពពីប្រិយមិត្ដ ទស្សនិកជនតាមរយៈការស្លៀកពាក់បែបសិចស៊ីយ៉ាងខ្លាំង។ នាងទើបចូលប្រឡូកក្នុងពិភពសិល្បៈកាលពីឆ្នាំ២០០៧ តែនាងមានជីវភាពរស់នៅយ៉ាងហ៊ឺហា មានលុយទិញរថយន្ដទំនើបជិះ។ ទន្ទឹមនេះនាងក៏សំបូរជោកជាំដោយរឿងអាស្រូវជាច្រើនផងដែររហូតកាលពី ពេលថ្មីៗ នេះមានព័ត៌មានថា នាងត្រូវក្រុមទំនើងវាយបែកកញ្ចក់រថយន្ដ ។ នាងជាអ្នកសិល្បៈថ្មីទើបតែមានគេស្គាល់ខ្លះៗនាពេលមុននេះតាមរយៈ ការខ្ចរខ្ចាយរឿងថា នាងទាក់ទងប្ដីគេ ហើយប្រពន្ធបុរសនោះគំរាមឱ្យនាងឈប់ទាក់ទងប្ដីរបស់ខ្លួន ដោយត្រៀមបញ្ចេញវីដេអូអាសអាភាសរបស់នាងទៀតផង។
នាងធ្លាប់ចូលរួមសំដែងភាពយន្ដបានតែប៉ុន្មានរឿង ប៉ុណ្ណោះ ដូចជារឿង“ព្រាយហាយសូ” ជាដើម ព្រមទាំងសំដែងកាយវិការខារ៉ាអូខេឱ្យផលិតកម្មទាំងក្នុង និងក្រៅប្រទេស។ ក្នុងឆ្នាំ២០១០នេះ នាងមានគំរោងចូលរួមសំដែងរឿងថ្មីមួយទៀតឱ្យផលិតកម្មអភិមង្គលជាតួ ឆ្នាសក្នុងរឿង“មន្ដអាគមស្នេហ៍ នាងធ្មប់”។ ក្រៅពីនេះនាងបើកលក់ផលិតផលកែសម្ពស្សដែលនាំមកពីប្រទេសកូរ៉េ និងមានភាគហ៊ុនមុខជំនួញរកស៊ីជួញដូរជាមួយបងប្រុសនាងនៅឯ ខេត្ដកំពង់ចាមផងដែរ ។
កញ្ញាកែវ សូរិយា វ័យ២៤ឆ្នាំ ទទួលរងពាក្យចចាមអារ៉ាមអាស្រូវជាច្រើនចាប់តាំងពីពាក់កណ្ដាលឆ្នាំ ២០០៩រហូតមកដល់ បច្ចុប្បន្ននេះ ដូចជាថា នាងយកប្ដីគេ ហើយត្រូវប្រពន្ធគេគំរាមបញ្ចេញវីដេអូអាសអាភាសរបស់នាងជាដើម ប៉ុន្ដែពាក្យចចាមអារ៉ាមទាំងនោះនាងច្រានចោលទាំងអស់ ហើយនិយាយថា មាសសុទ្ធមិនខ្លាចភ្លើង ។ ពេលនេះនាងលែងចង់ជួបប្រទះរឿងបែបនោះទៀតហើយដោយចង់យកចិត្ដទុកដាក់លើ មុខរបររកស៊ី និងក្នុងវិស័យសិល្បៈវិញ ។ បើសិនជាមានរឿងអ្វីកើតឡើងដូចពាក្យចចាមអារ៉ាមមែននោះ នាងក៏មិនខ្លាចអ្វីដែរ គឺនឹងប្រឈមមុខតទល់រហូតដល់ទីបញ្ចប់។ ថ្មីៗនេះនាងជួបគ្រោះថ្នាក់ចរាចរណ៍ដោយសារប្អូនស្រីនាងជាអ្នកកាន់ ដៃចង្កូតរថយន្ដជ្រុលទៅបុករបាំងថ្មចែកទ្រូងផ្លូវនៅម្ដុំគីរីរម្យ តែត្រូវបានដោះស្រាយ និងជួសជុលរថយន្ដរួចរាល់អស់ហើយ។ រឿងនោះមានការចាប់អារម្មណ៍ដោយសារពួកនាងជាម្ចាស់រថយន្ដឡិចស៊ីស៤៧០ បុករបាំងថ្ម ហើយចង់លាក់បាំងមុខមាត់របស់ខ្លួនក៏កុហកថា ពួកនាងជាកម្មកររោងចក្រ ។
ក្រោយពីជួបបញ្ហានោះកាលពីរាត្រីថ្ងៃទី១៧ឈាន ចូលថ្ងៃទី១៨ ខែឧសភា កន្លងទៅ នេះនាងត្រូវក្មេងទំនើងមួយក្រុមមានគ្នាជិត១០នាក់ព័ទ្ធវាយនាង និងធ្វើឱ្យបែកកញ្ចក់រថយន្ដនៅខាងមុខក្លឹបរាត្រីនៅពេលនាងចុចស៊ី ផ្លេរថយន្ដដើម្បីរកអ្នកយាមហែកសំបុត្រផ្ញើរថយន្ដ ។ នាងនិយាយថា នាងដឹងអំពីច្បាប់ចរាចរច្បាស់ណាស់ថា បើកបរពេលយប់មិនត្រូវចុចស៊ីផ្លេរថយន្ដទេ តែបើមិនចុចរកអ្នកយាមហែកសំបុត្រផ្ញើរថយន្ដមិនឃើញទេ។ ពេលនោះហើយដែលពួកក្មេងទំនើងនាំគ្នាចុះពីរថយន្ដរបស់គេមកព្រួត វាយនាងមិនសួរនាំអ្វីទេ ធ្វើឱ្យនាងភ័យខ្លាចរហូតដល់ពេលនេះមិនទាន់បាត់ផង ។
នាងនិយាយថា នាងមិនចង់មានរឿងវែងឆ្ងាយនោះទេ ទើបនាងមិនប្ដឹងសមត្ថកិច្ច សុខចិត្ដឱ្យចប់ទៅចុះ ។ បញ្ហានោះមិនមែនជារឿងស្នេហាត្រីកោណដូចគេយល់ច្រឡំទេ។ នាងអះអាងថា នាងគ្មានស្នេហាត្រីកោណអ្វីទេ ហើយក៏គ្មានគូស្នេហ៍ក្នុងស្រុកខ្មែរដែរ គឺនាងមានសង្សារជាជនជាតិកូរ៉េ ដែលបានស្រលាញ់គ្នាជិត១ឆ្នាំមកហើយ ពេលនេះកំពុងតែមើលចិត្ដស្វែងយល់ពីគ្នាទៅវិញទៅមកឱ្យបានច្បាស់ ជាងសព្វថ្ងៃដើម្បីសំរេចចិត្ដភ្ជាប់ពាក្យនៅចុងឆ្នាំ២០១០ ហើយឈានទៅរកពេលវេលាល្អរៀបមង្គលការ ។
នៅពេលសួរថា កន្លងមកឮគេថា នាងមានបើកហាងលក់ផលិតផលរក្សាសម្ពស្ស និងទិញរថយន្ដទំនើបជិះដោយសារសង្សារជនជាតិកូរ៉េជាអ្នកផ្ដល់ឱ្យ នាងតើពិតមែនទេ? នាងសើចរួចឆ្លើយតបថា នោះសុទ្ធតែជារឿងមិនពិតទេ ប្រាក់ទាំងអស់សំរាប់មុខរបររបស់នាង គឺបានមកពីការខិតខំតស៊ូសន្សំពីអាជីពសិល្បៈសំដែង និងបានមកពីរកស៊ីដាក់ភាគហ៊ុនជាមួយបងប្រុសនាងនៅឯខេត្ដកំពង់ចាម ។
ថ្មីៗនេះទៀតស្រាប់តែលេចឮពីលោក ជា ខេវិន ជាតារាសំដែងនិយាយថា នាងលួងលោមលោកទៅថតអោបគ្នាបែបស្រៀវស្រើបទុកជាអនុស្សាវរីយ៍ ប៉ុន្ដែនាងបែរជាចង់យករូបនោះទៅបង្កើតពាក្យចចាមអារ៉ាម ដើម្បីឱ្យទស្សនាវដ្ដី ឬសារព័ត៌មានចុះផ្សាយ ដើម្បីឱ្យល្បីឈ្មោះទៅវិញ ។ បញ្ហានេះនាង និយាយអួតថា “នោះជាពាក្យមិនពិត ព្រោះកន្លងមកនាងខ្ញុំត្រូវបានទស្សនាវដ្ដី សារព័ត៌ មានជាច្រើនចុះផ្សាយធ្វើឱ្យមហាជនគ្រប់ស្រទាប់វណ្ណៈបានឃើញបានស្គាល់ នាងខ្ញុំ និងទទួលបានភាពល្បីរួចទៅហើយរឿងអីនាង ខ្ញុំចាំបាច់ទៅលួងលោមលោកជា ខេវិន ដែលមិនមានទស្សនាវដ្ដី ឬសារព័ត៌មានចុះផ្សាយញឹកញាប់ដូចនាងខ្ញុំផងនោះ ។ រឿងដែល លោកខេវិនប្រឌិតខាងលើនាងខ្ញុំសូមច្រានចោល ហើយរឿងនេះមិនដឹងថា គាត់ប្រឌិត ដើម្បីតោងនាងខ្ញុំឱ្យមានភាពល្បីឈ្មោះដូចនាងខ្ញុំឬយ៉ាងណានោះទេ ។
កន្លងមកនាងខ្ញុំទៅថតរូបមិនដែលមានលោកខេវិន ថតជាមួយទេ ហើយមួយខែៗនាងខ្ញុំថតរូបពី៥០ ទៅ១០០ប៉ុស្ដិ៍ និងត្រូវចំណាយថវិកាពី៣០០ ទៅ៥០០ដុល្លារ ព្រោះនាងខ្ញុំស្រលាញ់សិល្បៈថតរូប។ ដូច្នេះរឿងអីនាងខ្ញុំទៅសុំលោកខេវិនថតជាមួយ។ រូបថតដែលនាងខ្ញុំថតជាមួយនោះ គឺលោកខេវិនទៅវិញទេចង់ថតជាមួយនាងខ្ញុំ ។ បើនាងខ្ញុំចង់ថតជាមួយប្រុសមែននោះមិនខ្វះទេ មិត្ដភក្ដិរួមអាជីពមានទាំងហ្វ្រេសស៊ីទៀតផង ហើយការដែលនាងខ្ញុំថតជាមួយគាត់នោះ គឺដោយសារតែគាត់មានផ្ទះនៅផ្លូវជាមួយផ្ទះនាងខ្ញុំ និងជាមិត្ដភក្ដិធ្លាប់សុំរថយន្ដនាងខ្ញុំជិះពេលទៅសំដែងជាមួយគ្នា ញឹកញាប់ណាស់ ហើយការថតថ្មីៗនេះទៀតសោត នាងខ្ញុំជាអ្នកចេញលុយទាំងអស់” ។ នាងបន្ដថា “តាមពិតទៅក្រោយពីថតរូបហើយទើបនាងខ្ញុំដឹងថា លោកជា ខេវិន មានបំណងអ្វីពិតប្រាកដ ព្រោះក្រោយថតរូបហើយ គាត់ទូរស័ព្ទមកនាងខ្ញុំ សុំនាងខ្ញុំថា គាត់ចង់បង្កើតពាក្យចចាមអារ៉ាមរឿងអាស្រូវជាមួយនាងខ្ញុំចុះផ្សាយតាម ទស្សនាវដ្ដី និងសារព័ត៌មាននានាដាក់ចំណងជើងថា “កែវ សូរិយា មានផ្ទៃពោះជាមួយជា ខេវិន”។ ពេលនោះនាងខ្ញុំបានតបវិញថា នាងខ្ញុំកំពុងតែស្រលាញ់គ្នាជាមួយសង្សារនាងខ្ញុំជាជនជាតិកូរ៉េ ហើយកំពុងតែ មើលចិត្ដគ្នារង់ចាំដំណឹងល្អ និងភ្ជាប់ពាក្យចុង ឆ្នាំនេះរឿងអីលោកខេវិនចង់បង្កើតរឿងបែបនេះស្រួលមិនស្រួល សង្សារនាងខ្ញុំយល់ច្រឡំ ដូច្នេះនាងខ្ញុំមិនអាចឱ្យខេវិនធ្វើដូច្នេះបានទេ នាងខ្ញុំមិនចង់ល្បីបែបរឿងឆ្កួតៗនេះទេ” ។
នាងនិយាយចោទលោកខេវិនទៀតថា “តាមពិតទៅរឿងនេះគាត់ចង់បង្កើតរឿង អាស្រូវជាមួយនាងខ្ញុំ ព្រោះគាត់ចង់ល្បី ឈ្មោះដោយឃើញនាងខ្ញុំមានឈ្មោះល្បី ស្រាប់ ។ នាងខ្ញុំជានារីខ្មែរមួយរូបដែរ ថ្វី បើនាងខ្ញុំចូលចិត្ដស្លៀកពាក់សិចស៊ី តែពេល ខ្លះនាងខ្ញុំក៏ចូលចិត្ដស្លៀកពាក់ជុំជិតតាម ទំនៀមទំលាប់ប្រពៃណីខ្មែរដែរ ហើយមិន ចង់មានរឿងអាស្រូវទេ ។ នាងខ្ញុំធុញទ្រាន់ ណាស់ ហើយពេលនេះមានគំរោងទៅនិមន្ដ ព្រះសង្ឃឱ្យស្រោចទឹករំដោះគ្រោះដល់នាង ខ្ញុំចំនួន៧វត្ដ តែដោយជាប់រវល់ការងារពេក ទើបស្រោចបានតែ៥វត្ដប៉ុណ្ណោះ តែនឹងបន្ដ ស្រោចឱ្យគ្រប់” ។
កញ្ញា កែវ សូរិយា អួតអាងបន្ដថា “នាង ខ្ញុំមានទេពកោសល្យសំដែង មានរូបសម្ពស្ស ស្រស់ស្អាត សមត្ថភាពប៉ុណ្ណឹងដែរ រឿងអី ទៅលួងលោមលោក ជា ខេវិន សុំថតរូប ជាមួយហាក់បីដូចជានាងខ្ញុំអន់ពេក ហើយមើលឃើញតែបុរសបក់ផ្លិតម្នាក់នេះឬអី? បើមានរឿងបែបនេះមែន សូមលោកខេវិន មកតទល់ជាមួយនាងខ្ញុំទល់មុខគ្នាដើម្បី និយាយការពិតថា តើអ្នកណាសុំអ្នកណាថត”។
លោកជា ខេវិន ក្នុងវ័យ២៥ឆ្នាំ ជាអ្នក ចំរៀង និងជាតារាសំដែងកាយវិការខារ៉ា អូខេ និងភាពយន្ដ។ លោកធ្លាប់សំដែងក្នុង រឿងភាគរបស់ស្ថានីយទូរទស្សន៍ ជទណ រឿង “ផ្កាក្នុងផ្កា” និងរឿង“ពាក្យសម្បថ” ដោយ លោកសំដែងជាតួឯក។ ក្រៅពីនេះលោក ធ្លាប់ចូលរួមសំដែងក្នុងខ្សែភាពយន្ដខ្នាតធំ រឿង“ព្រាយហាយសូ” ជាតួឯកផងដែរ ។
លោកនិយាយថា ក្រៅពីសំដែងភាពយន្ដ និងច្រៀងឱ្យក្រុមហ៊ុនក្នុងកម្មវិធីប្រគំតន្ដ្រី តាមបណ្ដាខេត្ដ-ក្រុងនានា និងច្រៀងជា កិត្ដិយសនៅលើឆាកប្រគំតន្ដ្រីចុងសបា្ដហ៍ តាមស្ថានីយទូរទស្សន៍នានា លោកជាតារា សំដែងកាយវិការខារ៉ាអូខេឱ្យផលិតកម្មទាំងក្នុង និងក្រៅប្រទេសជាច្រើនផលិតកម្ម។ ចាប់តាំងពីលោកបណ្ដែតខ្លួនចូលប្រឡូកក្នុង វិស័យសិល្បៈនាឆ្នាំ២០០៦មក លោកទទួល ជោគជ័យក្នុងអាជីព ។
លោកអះអាងថា ថ្មីៗនេះ លោកត្រូវនាង កែវ សូរិយា ជាតារាសំដែងដូចគ្នា និងជា មិត្ដភក្ដិបបួលលួងលោមឱ្យទៅថតរូបបែប ស្រើបស្រាលជាមួយគ្នា ហើយនាងចង់យក រូបថតនោះទៅបង្កើតពាក្យចចាមអារ៉ាម អាស្រូវដើម្បីឱ្យទស្សនាវដ្ដីចុះផ្សាយដើម្បី ឱ្យកេរ្ដិ៍ឈ្មោះរបស់នាងកាន់តែល្បី។ នៅពេលឮដំណឹងនោះលោកបានបដិសេធ ហើយ ហាមនាងកែវ សូរិយា ថា មិនឱ្យយករូបថត នោះទៅផ្សព្វផ្សាយឡើយ ព្រោះពេលថត នាងនិយាយថា គ្រាន់តែសុំថតទុកជាអនុ ស្សាវរីយ៍មើលលេងប៉ុណ្ណោះ ។
លោកមានការសោកស្ដាយបំផុតនៅពេលដឹងថា នាងកែវ សូរិយា ប្រុងយករូបថតរបស់លោកទៅផ្សព្វផ្សាយជាសាធារណៈ ហើយថែមទាំងចង់ប្រឌិតរឿងអាស្រូវដើម្បីឱ្យនាងល្បីឈ្មោះ។ លោកបញ្ជាក់ថា “បើមានទស្សនាវដ្ដីណាមួយចុះផ្សាយរូបខ្ញុំមិនបានសុំការអនុញាតពី ខ្ញុំទេនោះ ខ្ញុំនឹងប្ដឹងទៅតាមផ្លូវច្បាប់” ៕
កោះសន្តិភាព
កញ្ញាកែវ សូរិយា តារាសំដែងកាយវិការខារ៉ាអូខេ និងភាពយន្ដ
Source:http://kohsantepheapdaily.com.kh
No comments:
Post a Comment