ដោយ ៖ សាម៉ន
ថ្ងៃ ច័ន្ទ ទី ២៤ ខែ ឧសភា ឆ្នាំ ២០១០
ផ្ដល់ព័ត៌មានឱ្យកោះសន្ដិភាពតាមរយៈទូរស័ព្ទ ទឹម រដ្ឋា បានសម្ដែងនូវការហួសចិត្ដចំពោះព័ត៌មានថា នាងមានម្ចាស់បេះដូង ឬគូប្រចាំចិត្ដហើយ ។ នាងប្រាប់ថា នាងប្រាកដជាមិនទាន់មានអ្នកឃុំគ្រងបេះដូងនៅឡើយទេ ទាំងបេះដូង និងរូបកាយនាងនៅទំនេរស្អាត តែបើកទ្វារទទួលគ្រប់ពេលសំរាប់បុរស ដែលមានបំណងប្រាថ្នាពិតប្រាកដចំពោះរូបនាង ហើយនាងពេញចិត្ដចំពោះបុរសនោះវិញដែរ ។
ទឹម រដ្ឋា បានចាត់ទុកព័ត៌មានថា នាងមានគូប្រចាំចិត្ដនោះគឺជាការបិទទ្វារបេះដូង និងអនាគតរបស់នាង ព្រោះព័ត៌មាននោះអាចជារនាំងបិទមិនឱ្យបុរសៗដែលមានបំណងប្រាថ្នាយក នាងជាគូអនាគតត្រូវខកចិត្ដ និងមិនហ៊ានចូលមកសារភាពពាក្យថា ស្រលាញ់ ឬភ្ជាប់កិច្ចសន្យាស្នេហ៍ជាមិត្ដមួយរយឆ្នាំជាមួយនាង ។ នាងចាត់ទុកថា ព័ត៌ មានបែបនេះប្រាកដជាកើតមានចំពោះតារាគ្រប់រូបដោយចៀសមិនរួច ។
ទឹម រដ្ឋា បើកទំព័រសិល្បៈតាមរយៈនៃការប្រឡងជ្រើសរើសស្រីស្អាត ប្រុសស្អាត ក្នុងកម្មវិធីទូរទស្សន៍មួយ ។ ជីវិតសិល្បៈរបស់នាងហាក់ដូចជាជួបសំណាងល្អជាបន្ដបន្ទាប់ ខណៈពេលដែលផលិតកម្មមួយចំនួន ហៅនាងទៅថតកាយវិការ និងថតផ្សាយពាណិជ្ជកម្មធ្វើឱ្យនាងអាចប្រមូលបានថវិកាច្រើនគួរសម ក្នុងអាជីព ។ សព្វថ្ងៃនាងជាពិធី ការិនីនៅស្ថានីយទូរទស្សន៍អាស៊ីអាគ្នេយ៍ បន្ទាប់ពីធ្វើជាពិធីការិនីប្រកបដោយភាពជោគជ័យនៅស្ថានីយទូរទស្សន៍កង យោធពលខេមរភូមិន្ទ ។ ការងារមួយទៀតសំរាប់នាង គឺជាសមាជិកក្រុមបង្ហាញម៉ូដ រួមជាមួយតារាមួយចំនួនទៀត គឺអ្នកនាងលី ម៉ារី ណា, កែវ ពេជ្រពិសី, ទូច ស្រីលក្ខណ៍, សារាយសក្ខណា និងអ្នកនាងចន ច័ន្ទលក្ខិ
ណា ។ ក្នុងចំណាមតារាបង្ហាញម៉ូដទាំងនេះ ទឹម រដ្ឋា ត្រូវបានអ្នកទស្សនាវាយតម្លៃថា ជាតារាបង្ហាញម៉ូដដែលមានរូបសម្ពស្សស្រស់ស្អាត មានរូបរាងស័ក្ដិសមជាតារាបង្ហាញម៉ូដ ព្រោះនាងមានកម្ពស់និងទំហំទាំង៣ត្រូវខ្នាតតែម្ដង។ ក្រុមតារាបង្ហាញម៉ូដដែលមានឈ្មោះថា ម៉ូដែលឃែមបូឌា ដែលក្នុងនោះមានទឹម រដ្ឋា ដែរនោះបានបង្ហាញម៉ូដក្នុងកម្មវិធីធំៗនៅក្នុងប្រទេស និងក្រៅប្រទេស ។ ថ្មីៗនេះក្រុមម៉ូដែលឃែម បូឌាបានចេញទៅបង្ហាញម៉ូដនៅក្នុងពិធីតាំងពិព័រណ៍ទីក្រុងសៀងហៃ ប្រទេសចិន ។
ទឹម រដ្ឋា បានបញ្ជាក់ថា រូបនាងប្រាកដជាមានបុរសតាមសុំស្នេហ៍ច្រើនប្រាកដមែន ។ មិនតែប៉ុណ្ណោះក៏មានបុរសមួយចំនួនហ៊ាន ទាំងសន្យាថានឹងផ្ដល់ប្រាក់ រថយន្ដទំនើប ផ្ទះ ព្រមទាំងសន្យាបើកហាងមួយសំរាប់នាង ប្រសិនបើនាងយល់ព្រមជាមួយគេ ។ ប៉ុន្ដែ រហូតមកដល់ពេលនេះ រូបនាងមិនទាន់យល់ ព្រមជាមួយបុរសម្នាក់ណាឡើយ ហើយហ៊ានធានាថា នាងប្រាកដជានៅទំនេរស្អាត ។ តាមសំដីដែលតារាបង្ហាញម៉ូដទឹម រដ្ឋា អះអាងនោះគឺជាដំណឹងមួយដ៏ល្អសំរាប់សុភាពបុរសទាំងឡាយ ដែលប្រាថ្នាចង់បានកុលាបមួយទងដ៏ស្រស់ស្អាតនេះ ៕
កោះសន្តិភាពកញ្ញា ទឹម រដ្ឋា
Source:http://kohsantepheapdaily.com.kh
No comments:
Post a Comment